ទុកទុកដែលសង្គមគោរពស្រលាញ់

ទុកទុកដែលសង្គមគោរពស្រលាញ់

               ទុកទុកឬរ៉ឺម៉ក់កង់បីបានចូលរួមអភិវឌ្ឍន៏សង្គមកម្ពុជាបានមួយចំនែក និងអាចជួយជីវភាពប្រជាពលរដ្ឋក្រីក្របានមួយភាគផងដែរ។ ដោយសារតែទុកទុកគឺជាមធ្យោបាយធ្វើដំណើរទីមួយដែលភ្ញៀវទេសចរណ៏និយមជិះលេងនិងទស្សនានូវទេសភាពតាមដងផ្លូវនៅតំបន់ទេសចរណ៏នានានិងទីក្រុង។ មិនថាភ្ញៀវទេសចរណ៏បរទេសនោះទេ សូម្បីតែប្រជាជនកម្ពុជាក៏បានជ្រើសរើសទុកទុកជាមធ្យោបាយធ្វើដំណើរទៅផ្សារឬទៅកន្លែងផ្សេងៗ និងជាសេវាដឹកជញ្ជូនឥវ៉ាន់ដែរមានតម្លៃថោកជាងឡានជាដើម។ អាចនិយាយបានថាទុកទុកក៏បានចូលរួមចំណែកលើកស្ទួយសេដ្ឋកិច្ចជាតិបានដែរ។

បើទោះបីជាយ៉ាងនេះក្តី ទុកទុកក៏ជាទុក្ខកង្វល់របស់អ្នកបើកបរតាមផ្លូវជាពិសេសគឺជាឆ្អឹងទទឹងកររបស់អ្នកបើករថយន្តមួយចំនួនធំដោយសារតែអាកប្បកិរិយាបើកបរមិនសមរម្យរបស់ម្ចាស់ទុកទុក  នេះតែម្តង។​ (រ៉ឺម៉ក​កង់បី​ជា​ឆ្អឹង​ទទឹង​ក​របស់​អ្នក​បើក​រថយន្ត​ឬ?)

ជានិច្ចកាលគេឃើញមានការប៉ះទង្គិចគ្នាជារ៉ើយៗដោយសារតែទុកទុកទាំងនោះជិះកៀរឡានរហូតដល់មានពេលខ្លះធ្វើឲ្យឆ្កូតថ្នាំឡានគេនិងកំប៉ិតជាដើម។ តួរយ៉ាងដូចករណីរបស់ឧកញ្ញា ដួងឆាយ ដែលត្រូវបានទុកទុកជិះកៀរខូចថ្នាំឡាន រហូតដល់ទៅពីរលើក​ ដោយលើកទីមួយ រ៉ឺម៉ក់កង់បី មួយបានបើកបញ្ច្រាស់ផ្លូវទាំងស្ថានភាពស្រវឹង រួចក៏ជ្រុលទៅប៉ះឡានរបស់លោក និងលើកទីពីរបុកពីក្រោយ។ ដើម្បីបញ្ចប់រឿង ម្ចាស់ទុកទុកគ្មានអ្វីក្រៅពីលើកដៃទាំងពីរសុំទោសនោះទេ តែជាការឆ្លើយតបឧកញ្ញា ដួងឆាយ គ្រាន់តែឲ្យបោះសម្រាម និងព្រមានជាពាក្យសម្តីតែប៉ុណ្ណោះ។ នេះសំណាងហើយដែរប៉ះចំ ឧកញ្ញា ដែរមិនចង់មានរឿងវែងឆ្ងាយ ចុះទម្រាំបើប៉ះចំជើងកាងក្រុងដែរបើកឡាន Tundra បុកម៉ូតូគេហើយដឹកម៉ូតូគេទៅដុតចោលទៀតនោះ តើអ្នកបើកទុកទុកទាំងពីរលើកនោះនឹងទៅជាយ៉ាងណា?

បើទោះបីជាមានបញ្ហាជាច្រើនលើកច្រើនសារច្រើនករណីយ៉ាងណាក្តី ក៏គេមិនដែរឃើញរដ្ឋាភិបាល ឬអាជ្ញាធរដែនដីមានវិធានការអ្វីជាដំកំភួនដើម្បីដោះស្រាយរឿងរ៉ាវរវាង ទុកទុកនិងរថយន្តនេះដែរ។ ប្រហែលជាមន្ត្រីទាំងនោះពេលទៅណាមកណា តែងតែមានម៉ូតូឡានសារ៉ែនការពារហើយ ទើបពួកគាត់មិនដែរជួបករណីបែបនេះ និងមិនចេះឈឺក្បាលព្រោះវាមិនមែនជារឿងគ្រួសាររបស់គាត់។

 គេឃើញមានទុកទុកនៅគ្រប់ទីប្រជុំជនទាំងអស់នៅទូទាំងប្រទេសកម្ពុជា ដោយគ្រាន់តែនៅទីក្រុងភ្នំពេញ ចំនួនទុកទុកមានមិនតិចជាងប្រាំបីពាន់គ្រឿងនោះទេ។ ចំនួនដ៏ច្រើនលើសលប់នេះក៏អាចបង្ករឲ្យមានការស្ទះចរាចរណ៏ផងដែរ ខណៈដែលចំនួនយាន្តយន្តដែលបានចុះបញ្ជីមានការកើនឡើង ១៤ភាគរយ ពោលគឺ៣,២លានគ្រឿងបើប្រៀបធៀបពីឆ្នាំ២០១៥ដល់ឆ្នាំ២០១៦ នេះបើតាមរបាយការណ៏របស់ក្រសួងសាធារណៈការនិងដឹកជញ្ជូនប្រចាំឆ្នាំ២០១៦កន្លងទៅ។

ដូចនេះដើម្បីកុំឲ្យទុកទុកឬរ៉ុម៉ក់កង់បីមានបញ្ហាតទៅទៀត អ្នកបើកទុកទុកគួរគប្បីអនុវត្តន៏គោលការណ៏ទាំងប្រាំបីដូចតទៅ៖

1.    មិនត្រូវជិះបញ្ច្រៀត៖ អ្នកបើកកង់បី មិនត្រូវជិះបញ្ជ្រៀតជាមួយនឹងឡាន ឬម៉ូតូឡើយ ព្រោះនាំឲ្យមានការប៉ះពារគ្នាទៅវិញទៅមក។

2.    ត្រូវបើកលើខ្សែជាមួយរថយន្ត៖ បើទោះបីទុកទុកមានម៉ូតូជាក្បាលម៉ាស៊ីនក៏ដោយ ប៉ុន្តែមាឌនិងទំហំសឹងតែស្មើរនឹងកូនឡានមួយទៅហើយ ដូច្នេះអ្នកបើកទុកទុកទាំងអស់គួរតែបើកតាមខ្សែជាមួយរថយន្ត និងឲ្យមានសណ្តាប់ធ្នាប់ ដើម្បីកុំឲ្យបិទផ្លូវម៉ូតូ។

3.    ត្រូវមើលឲ្យបានគ្រប់ជ្រុងជ្រោយមុននឹងបត់៖ ដោយមានពេលខ្លះអ្នកបើកកង់បីមួយចំនួនមិនបានមើលក្រោយ ឬឆ្វេងស្តាំនោះទេ ពោលគឺចង់បត់ត្រូវបត់ភ្លាមៗតែម្តង ដែរហេតុនេះបានបង្ករគ្រោះថ្នាក់ដល់អ្នកដ៏ទៃនិងអ្នកបើកកង់បីខ្លួនឯងផងដែរ។

4.    មិនត្រូវបើកបរបញ្ច្រាស់ផ្លូវ៖ ការបើកបរបញ្ច្រាស់ផ្លូវជាប្រភពដែរបង្ករឲ្យមានការកកស្ទះចរាចរណ៏ និងអាចបង្កើតឲ្យមានគ្រោះថ្នាក់ចរាចរណ៏ ដូចករណីឧកញ្ញា ដួងឆាយ ពីខាងដើម។ ដូចអ្វីដែរបាននិយាយពីខាងលើ ទោះបីទុកទុកមានម៉ូតូជាក្បាលម៉ាស៊ីនក្តី ប៉ុន្តែមាឌនិងទំហំសឹងតែស្មើរនឹងកូនឡានមួយទៅហើយ ការបើកបញ្ច្រាស់របស់កង់បីអាចបិទផ្លូវម្ខាងទៀតបាន។

5.    ត្រូវគោរពភ្លើងសញ្ញាចរាចរណ៏៖ មិនថាឡានឬម៉ូតូឡើយ ទុកទុកក៏ជាយាន្តជំនិះមួយដែរ។

6.    បើស្រវឹងសូមកុំបើកបរ៖ ពាក្យស្លោកនេះត្រូវគេបានលឺបានដឹងគ្រប់ៗគ្នា។ គេឃើញមានអ្នករត់កង់បីមួយចំនួនជួបជុំផឹកស៊ីតាមចញ្ចើមផ្លូវដោយមិនខ្វល់ពីភ្នែកអ្នកដ៏ទៃ។ បើទោះបីជាយ៉ាងនេះក្តីអ្នករត់កង់បីគួរតែពិសារដោយទទួលខុសត្រូវ និងគិតពីសុវត្ថិភាពខ្លួនពេលត្រលប់ទៅផ្ទះវិញផងដែរ។

7.    ត្រូវចតឲ្យមានសណ្តាប់ធ្នាប់៖ គេឃើញមានការបង្ហោះរូបនិងវីដេអូជាច្រើនក្នុងបណ្តាញសង្គមហ្វេសប៊ុក លាយឡំជាមួយនឹងសារមួយចំនួនថា ការចតមិនចេះគិតរបស់អ្នករត់កង់បី ដោយខ្លះចតលើទ្រូងផ្លូវ ខ្លះចតជាពីរជួរ ហើយខ្លះទៀតចតលើគំនួសសញ្ញាចរាចរណ៏ជាដើម ដែរជាហេតុនាំឲ្យមានការកកស្ទះចរាចរណ៏។

8.    ត្រូវចេះច្បាប់ចរាចរណ៏៖ បើទោះបីទុកទុកមិនមានសាលាបង្រៀនបើកបរក្តី តែដើម្បីសុវត្ថិភាពភ្ញៀវតាមដងផ្លូវ អ្នករត់កង់បីទាំងអស់ គួរតែចេះច្បាប់ចរាចរណ៏ខ្លះដែរ។

ប្រសិនបើអ្នករត់ទុកទុកអាចគោរពតាមគោលការណ៏ទាំង 8 ខាងលើ នោះស្ថានភាពចរាចរណ៏អាចនឹងល្អប្រសើរជាងមុនបានមួយកំរិត។ លើសពីនេះទៅទៀតក៏អាចធ្វើឲ្យអ្នកដំណើរតាមដងផ្លូវដ៏ទៃទៀត ជាពិសេសអ្នកបើករថយន្តនឹងគោរពស្រលាញ់ជឿរជាក់។  ស្ថានភាពចរាចរណ៏ល្អប្រសើរ និងមានអ្នកគោរពចូលចិត្តទៀត  នោះកំនើនអ្នកជិះទុកទុកក៏ប្រហែលជាមានការកើនឡើងផងក៏មិនដឹង។

          ដូចច្នេះប្រសិនបើសង្គមយើងមានប្រជាជនដែលមានការយល់ដឹងច្រើន មានការអត់អោនឲ្យគ្នា និងចេះយោគយល់អធ្យាស្រ័យឲ្យគ្នាទៅវិញទៅមកនោះ យើងទាំងអស់គ្នានឹងបើកបរដោយស្នាមញញឹម និងសុវត្ថិភាពជាក់ជាមិនខាន។

រៀបរៀងដោយ​៖ កែវ សុង
Download this article
Like My Facebook Page