លាតត្រដាងអាថ៍កំបាំងនៃសញ្ញា “អូម”.

លាតត្រដាងអាថ៍កំបាំងនៃសញ្ញា “អូម”.

អ្នកប្រហែលជាធ្លាប់ឃើញសញ្ញា  អូម ដែលជាគេនិយមចាក់សាក់លើដងខ្លួន និងគូជាគំនូរលើជញ្ជាំងដែលគេដេគ័រនៅក្នុងហាងនិងកន្លែងកម្សាន្តឬទីសក្ការៈបូជាមួយចំនួនផងដែរ។ អូម ជាភាសាអង់គ្លេសគឺ “Om”ឬ “Aum” គឺជាសញ្ញាមួយដែលមានអត្ថន័យបង្កប់យ៉ាងជ្រាលជ្រៅក្នុងដំណើរជីវិតរបស់មនុស្ស។ មិនថានៅក្នុងសាសនា ឬ សង្គមជាក់ស្តែងនោះទេ អូម ត្រូវបានគេប្រើជាសញ្ញាសុទិដ្ឋិនិយម  និង ទេវៈនិយម។ ដូចនេះតើអូមមានអត្ថន័យយ៉ាងម៉េចទៅ?

អូមផ្គុំឡើងដោយអក្សរសំស្រ្កឹតបីគឺ អា(A) មានន័យថាការចាប់ផ្តើម។ ទារកដែលចាប់បដិសណ្ធិចេញពីផ្ទៃ ម្តាយដំបូង តែងតែស្រែកយំ “អា” ជាសញ្ញាដែលបង្ហាញថាពួកគេចាប់ផ្តើមទទួលស្វាគមន៏ពីភពផែនដីដែលស្រស់បំព្រងនៃយើងនេះ។ បន្ទាប់មកពួកគេស្រែកថា អ៊ូ(U) បានសេចក្តីថាពួកគេកំពុងតែសម្របខ្លួនដើម្បីរស់រានមានជីវិតជាមួយពួកយើង ហើយនោះជាអក្សរទីពីររបស់ អូម។ នៅទីបំផុតទារកដែលគួរឱ្យស្រលាញ់ ក៏ចេះបៅដោះម្តាយខ្លួនហើយបញ្ជេញសម្លេង អឹម ឬ ម (m) ឬ ហៅម្តាយថា “ម៉ាក់” ឬ “ម៉ាម៉ា” នោះហើយជាអក្សរទីបីនៃសញ្ញា អូមនេះតែម្តង។ ដោយសារតែ អូម ផ្គុំឡើងដោយអក្សរសំស្រ្កឹតបីនេះ និងបញ្ជេញសម្លេងដោយមិនកំរើកអណ្តាត នេះហើយទើបគេគិតថាវាសញ្ញាអច្ឆរិយៈ។

មែនទែនទៅ អូមគឺជាសញ្ញាមួយបង្កើតដោយសាសនាព្រាហ្មណ៍ដែលមានឥទ្ធិពលខ្លាំងបំផុតនៅប្រទេសឥណ្ឌាកាលដ៏យូរលុងណាស់មកហើយ។ បន្ទាប់មកគេឃើញមានសញ្ញានេះនៅក្នុងព្រះពុទ្ធសាសនាផងដែរ ហើយនៅតែមានអត្ថន័យខ្លាំងរហូតមកដល់សព្វថ្ងៃ។ នៅក្នុងទ្រឹស្តី​ព្រហ្មញ្ញសាសនា អូមតំណាងឱ្យព្រះហរិហរៈ ដែលយើងគ្រប់គ្នាស្គាល់ថាជាការរួមបញ្ចូលគ្នានូវព្រះបីអង្គពោលគឺ៖ ព្រះឥសូរ ជាអ្នកបង្កើតលោក, ព្រះវិស្ណុ ជាអ្នកកសាងលោក និង ព្រះសិវៈ ជាអ្នកបំផ្លាញលោក។ ការភ្ជាប់ព្រះទាំងបីអង្គជាមួយនឹង អូម ​ហាក់ដូចជាស៊ីសង្វាក់គ្នាយ៉ាងខ្លាំងជាមួយនឹងសម្លេងទាំងបីរបស់ អូម​គឺ អា (ការចាប់ផ្តើម)  អ៊ូ(ការវិវដ្ត) និង អឹម(ការបញ្ចប់)។​

ក្នុងទស្សនៈព្រះពុទ្ធសាសនា ពិសេសក្នុងនិកាយមហាយានដែលប្រតិបត្តិខ្លាំងក្នុងទឹកដីទីបេ និងប្រទេសអាស៊ីកណ្តាល អូមគឺជាសម្លេងនៃចក្រវាឡមហាសាល(The Sound Of Universe)។នៅក្នុងទីវត្តអារាម​ ប្រសិនបើអ្នកបានស្តាប់ព្រះសង្ឃបន្លឺព្រះដីការ សម្លេងអូមយ៉ាងស្រុះគ្នានោះ អ្នកប្រាកដជាមានអារម្មណ៍ព្រឺសម្បុរខ្ញាក់ ហាក់បានជាមានអ្វីម្យ៉ាងមកដាស់សតិអ្នកពីដំណេកដែលកំពុងតែលុងលក់ស្កុបស្កុល ឱ្យមកស្តាប់ព្រះធម៌ដ៏ប្រសើរ។ ចក្រវាឡដ៏ធំមហិមានេះហើយដែលជាទីស្ថានដែលព្រះពុទ្ធបានទៅដល់ដែលគេហៅថា និព្វាន ជាឋានសួគា៍ដ៏ស្ងប់ស្ងាប់បំផុត។ រូបំ ទុក្ខំ អនិច្ចំ អនត្តា បានសេចក្តីថា កើត ចាស់ ឈឺ ស្លាប់ វាជាមាគ្គាធម្មជាតិដែលមនុស្ស សត្វ ទាំងឡាយកំពុងប្រាស្រ័យ និងធ្វើដំណើរជាមួយនឹងការប្រែប្រួលនៃសភាវៈរាងកាយដោយមិនចេះឈប់ឈរ។ ដោយហេតុនេះហើយទើបអ្នកនិយមសាករូបមួយចំនួនបានសាកសញ្ញាអូម​ ដោយគេមានជំនឿរថាវាជាសញ្ញារបស់ព្រះ។ អូមក៏តំណាងឱ្យអតិតកាលដែលកន្លងផុតទៅ បច្ចុប្បន្នកាលដែលកំពុងតែកើតមាន និងអនាគតកាលដែលនឹងប្រឈមទៅថ្ងៃខាងមុខ។

នៅមានការប្រើប្រាស់ និងការយល់ឃើញជាច្រើនទៀតដែលមិនអាចរៀបរាប់អស់។ រហូតមកដល់បច្ចុប្បន្ននេះ មិនត្រឹមតែ​ព្រហ្មញ្ញសាសនា និងព្រះពុទ្ធសាសនាប៉ុណ្ណោះទេ ដែលមានជំនឿរលើនិមិត្តសញ្ញានេះ​ មានសាសនាជាច្រើនទៀតនៅមជ្ឈឹមប្រទេសមួយចំនួនក៏ទទួលស្គាល់ផងដែរ សូម្បីតែក្រុមសង្គមងងឹតមួយចំនួននៅអាស៊ី ក៏និយមប្រើជាសញ្ញាសំគាល់ដែរ។ ជារួម អូម(Om, Aum) ត្រូវបានមនុស្សទូទៅទទួលស្គាល់ដូចគ្នា នោះមានន័យថា “ព្រះ”។  “អូម” សម្លេងតែមួយម៉ាត សញ្ញាមួយតូច ប៉ុន្តែអត្ថន័យជ្រាលជ្រៅ គឺជាសញ្ញាអច្ឆរិយៈមួយដែលពិតជាគ្មានអ្វីមកអាចកាត់ថ្លៃបានឡើយ៕